Thursday, April 5, 2007

ليسو شيــاطيــن

طول عمرنا من واحنا عيال بنتعلم نكره اسرائيل , في كل حتة في البيت المدرسة الجامع الكنيسة التليفزيون السينما
و دايما نفهم ان اسرائيل هيا اصل المشكلة و كل مشكلة , و انها طول ماهي موجودة هنفضل نكرهها و نحاربها. كأن الكبار الي كانو بيعلمونا كده بيعوضو عدم قدرتهم على هزيمة اسرائيل في اطفالهم , فبيعلموهم يكرهوها و يشنأوها يمكن هما لما يكبرو يعرفو يقضو عليها و ينهوها و يرموها في البحر.
كل الشيوخ في كل صلاة و في كل رمضان يقعدو يستجدو لعنات السماء على اسرائيل و اليهود و من حالفهم
طول عمرنا نتفرج على شكل الحاخام اليهودي و نكرهه, و نتفرج على اليهود و هما بيصلو قدام الحيطة بتاعتهم دي و نكرهم , نكرههم كلهم رجال و ستات و اطفال و عجزة و مقعدين و مرضى و حوامل
نكره علمهم و لغتهم و شكل بلدهم على الخريطة

نكره اسمهم , نكره كلمة اسرئيل
اتعلمنا و اتربينا نكره نكره نكره نكره
حتى بعد ما بأى في سلام على الاقل بيننا و بينهم و خلص زمن الحروب , برضو فضلنا نكرهم و الكبار يعلمونا نكرهم,يعني مثلا واحد زيي اتولد بعد ما اخر حرب بين مصر و اسرائيل ما خلصت ب عشر سنين , و مع ذلك زي ما اتعلمت اكل و اشرب و اتكلم اتعلمت اكره اسرائيل و شعب اسرائيل.
طيب ليه؟؟ ليه تبقى الكراهية شعور طبيبعي ؟؟ دي الكراهية بتعمي القلب زي ما قال يوسف شاهين

زمان كان في حروب00
طيب ما كان في حروب في كل مكان في العالم , طب ما مصر زمان حاربت ليبيا و السودان و حاربت السعودية و حاربت تركيا و حاربت بلاد اوروبا . و بلاش ما امريكا رمت قنبلتين نوويتين على اليابان و المانيا ما دمرت اوروبا.
اسرائيل نشأت مكان فلسطين00
مين قال؟ الحقيقة بأى ان عمر ما كان في شيئ يسمى الدولة الفلسطينية و ان المنطقة دي كانت تحت الاحتلال العثماني و تحت الانتداب البريطاني على انها اقليم غرب الاردن و معاها اورشليم القدس او مهما كانت المسميات المهم انه مكانش في دولة فلسطينية جت احتلتها دولة تانية و لو اني طبعا مقدرش انكر ان في احتلال دلوقتي ,لكنه احتلال دولة لأقليم مجاور مش احتلال دولة لدولة تانية

ده مكان و ارض فلسطين مش اسرائيل00
طيب و انا مالي انا مش هتكلم في تاريخ قديم و علم اجناس و انا ميهمنيش مين كان عايش في الارض دي ايام العصر الحجري و انا مالي ؟؟ طب يعني ماهو انتو لو هتفكرو كده طب ما زي الاسرائيلين ما جم من بره (و ده في شك كبير) الفلسطينيين كمان جم من بره و اكبر دليل على كده اسمهم , محدش قبل كده طبعا سأل نفسه عني ايه معنى كلمة فلسطين دي ؟ كلمة فلسطين مشتقة من اسم قبائل البالاستPalastine
الي كانت زمان بتعيش في جزر البحر الابيض المتوسط و زمان حاولت تيجي و تستوطن مصر لكن الملك رمسيس الثالث حاربهم طردهم برا مصر فراحو استقرو في شرق المتوسط , و بلاش ما قبلهم ماكان في قبائل الرعاة الهكسوسية ما كانت مستوطنة ارض اسيا الصغرى و منها دخلت و احتلت مصر لغاية ما طردهم الملك احمس , طب ماهو لو الارض بتاعة الفلسطينيين امال الهكسوس راحو فين؟؟
فمعناها ايه المتاهة دي الارض ملك الناس الي عايشين عليها مليش دعوة جم منين ولا اصلهم ايه ؟؟


اني انكر على شخص حق وجوده في مكان لان جد جده مكانش موجود هنا دي منتهى العنصرية و التخلف و التعصب


طب اسرائيل جت هنا ليه ما يروحو اي حتة تانية؟؟

كلام عظيم بس هية الفكرة انو لو اتوجد شخص يهودي في اي مكان في العالم و الشخص ده تخيل ان المكان ده هو وطنه التاريخي و القومي و العرقي و انه لازم يروح يعيش هناك , و راح فعلا عاش هناك و اتجوز و خلف و اشتغل هناك
ماهو ده في حد ذاته من حقه كأنسان.. من حقه يسافر او يهاجر او يحب يعيش و يستوطن مكان محدد , ده من حقه كأنسان,, زي بالظبط حق المصري الي نفسه مثلا يهاجر استراليا و شايف ان استراليا هيا ارض احلامه وانها مكانه الي ممكن يلاقي فيه نفسه . الفرق بس ان الشخص ده لازم يلتزم بالقوانين و الاعراف و التقاليد الخاصة بالمكان الي هوا نفسه يروحله ودي مش حالتنا في اسرائيل و فلسطين لان زي ما قولت لم تكن هناك دولة فلسطينية ابدا و اليهود هما الي اخدو المبادرة و اعلنو الدولة و الحكومة ,, و كان ممكن في نفس وقت اعلان اسرائيل او في الاربعينات و الخمسينات يتم اعلان دولة فلسطينية لكن انا اظن ان مكانش الفلسطينيين عايزين دولة هما كانو عايشين مع اليهود و خلاص و كانت كل مطالبهم بتيجي من انهم اقلية مضطهدة داخل اسرائيل مش انهم اصحاب دولة فلسطينية ,, ده رأيي

اسرائيل بتكرهنا و هيا السبب في تخلفنا00
برضو عظيم بس تعرفو انا لو هقول حاجة هقول اسرائيل بتكرهنا عشان احنا كرهناها الاول ,و لو هما بيكرهونا قيراط احنا بنكرهم اربعة و عشرين , و هما طبيعي شايفين التحريض ضدهم عامل ازاي جوا مصر و في كل مكان و على كل المستويات ,و هما مش خواجات عشان يبقو كويسين معانا و احنا بننعل سلسفين جدودهم في التليفزيون و الجرايد و الجوامع,و طبيعي يعملولنا الف حساب يعملو حساب للكراهية الي احنا ادمناها و حبيناها
و اسرائيل سبب تخلفنا ليه يعني ؟؟ هيا الي جابت حسني مبارك؟ هيا الي جابت الاخوان؟ هيا الي حرقت القطورات و غرقت العبارات؟ هيا الي عملت انفلونزا الطيور؟ هيا سبب الغلاء؟ هيا سبب الموصلات الي مفيهاش مكان لرجل؟هيا سبب العمارات الي بتقع؟ و غيره و غيره و غيره

ازاي يعني هيا سبب تخلفنا؟؟ سبب تخلفنا هوا احنا يا سادة
و لو كنا كرهنا حسني مبارك و لا كرهنا تجار الدين الاخوان الي حسني بيتحجج بيهم و مش عايز يسيب مكانه عشان هما مينطوش على الحكم و يقلبوها افغانستان . لو كنا كرهنا دول كنا اتقدمنا .. لكن احنا بس بتكره اسرائيل

طيب و الفلسطينين و الانتفاضة و اطفال الحجارة؟؟
مع خالص احترامي الشديد للشعب الفلسطيني لكن انا مش عارف المشكلة دي مش عايزة تتحل ليه . كل مكان ف العالم كان في نزاعات لكنها انتهت الا النزاع ده مش عارف ليه مش عوز يخلص رغم كل حاجة..
الفلسطينيين على عيني و راسي و هما طبعا اخوة في الانسانية لكن انا مقدرش احط مصلحتهم قبل مصلحة بلدي زي ماهما مش ممكن يحطو مصلحتي قبل مصلحتهم
و بعدين انا ممكن اقول ان كان قدامهم مليون فرصة لبدأ انهاء الصراع و انهاء الاحتلال و بداية السلام و هما الي فوتوها , و اخر حاجة عملوها حكومة حماس الي مش راضية اساسا تعترف بأسرائيل مع ان الانتخابات الي جابتها للسلطة اسرائيل الي سمحت بوجودها و اتعملت بناء على اتفاقيات اوسلو الي فيها اسرائيل اعترفت بمنظمة التحرير و منظمة التحرير اعترفت باسرائيل
فانا مش فاهم طيب لما هما حابين دايرة الصراع و العنف و الموت و الدمار تستمر هما احرار و انا كفاية عليا قوي الخراب الي بيجي من ناحيتهم عندي ,كفاية ان بسبب الصراع ده انا مبتجيليش لا سياحة ولا استثمارات و لا عارف ااكل شعبي

فالفلسطينيين ليهم كل احترامي لكن لا دعم و لا تاييد الا للسلام و السلام فقط و السلام الواقعي الحقيقي المبني التسامح و قبول الاخر ونبذ العنف

بس كده

في واحد بأى زي الفل هيطلعلي يقولي ايوة بس المسجد الاقصى و الاسلام و لازم نستعيد مقداساتنا 00
و واحد زيو يهودي برضو يقولي الهيكل و التوراة ودي ارض الميعاد الي ربنا قال عليها في كتابه00

هحلها ازاي أنا دي بأى؟؟
ماهو انت من حقك تؤمن بالقرآن و هوا كمان من حقو يؤمن بالتوراة
هقولكو ايه هقول كل واحد معلش يعني ييجي على نفسه و يحط كتابه في جيبه و يقبل يعيش مع اخوه الانسان الي زيو ؟؟ هترضو؟؟
انا زي ما بقول للمسلم بقول لليهودي و للمسيحي كمان
هقولكو لازم كل واحد فيكو يفكر في التاني زي ما بيفكر في نفسه

و كلكو تقبلو بعض و تحترمو بعض
اليهودي يقبل ان المسلم يصلي معاه في نفس المكان
و المسلم برضو يقبل ان اليهودي يصلي معاه في نفس المكان

و صدقوني هتبقى اكتر صلاة ربنا هيتقبلها لانها صلاة اساسها الاخوة و المساواة

يا جدعان داحنا بشر زي بعض ربنا خلقنا بشر كلنا زي بعض مفيش فرق بين المسلم و اليهودي

يا جدعان طب و الحل ؟؟ يعني انتو تفتكرو ربنا يرضيه انكو تفضلو تقتلو و تموتو و تكرهو بعض كده؟؟

كلمة اخيرة
الكراهية هيا ابشع شعور ممكن يشعر بيه انسان و انا مش فاهم و مش متخيل ازاي نسمح لنفسنا نكره اوي كده .و الكراهية دي اول ما بتضر بتضرنا احنا

و انا مبقولش ان مبيحصلش هناك قتل و اعتقالات و بلاوي زرقا ,, لكن الكراهية مش حل, و العنف مبيولدش غير العنف

الاسرائيليين و اليهود ناس زيهم زينا زي اي حد , بيحبو يلبسو كويس و ياكلو كويس و يعلمو ولادهم و يدخلوهم الجامعة , عندهم برضو مغنينهم و شعرائهم و فنانينهم زينا بالظبط و زي اي شعب تاني في الدنيا
الفكرة بس اننا نبطل كراهية و نشوف طريقة تخلينا نحاول نتفاهم معاهم
و كمان صدقوني هما مبيكرهوناش ولا حتى بيكرهو الفلسطينيين و مش بيمشو في الشارع عريانيين و اول ما يلمحو عيل فلسطيني يقومو يقتلوه ,, ده في جرايد و احزاب بحالها جوا اسرائيل ضد الاحتلال, و ده هناك مثلا في جمعية من الامهات الاسرائيليات واخدين لنفسهم مهمة مراقبة نقاط التفتيش الاسرائيلية و فضح لا انسانية الجيش الاسرائيلي في تعامله مع الفلسطينيين,,و عساكر اسرائيلين بيرفضو الخدمة في فلسطين و بيتحاكمو بالسبب ده ,, وكمان نواب في البرلمان الاسرائيلي بيتكلموعن حقوق الفلسطينين للاسف يمكن احسن من بعض الفلسطينيين الي ميعرفوش غير لغة القتل و التخريب, يا جدعان مش معقول نصدق الافلام و المسلسلات الهابطة الي بتشتم فيهم كده عمال على بطال
انا مبقولش انهم ملايكة بترفرف بجناحين لكن برضو هما مش شياطين, مينفعش يكونوا شياطين
مينفعش لانهم بشر زينا زيهم

مش شاطين

16 comments:

ibn nasser - ابن ناصر said...

اول حاجه فعلا فاسرائيل ليسوا شياطين بالمره بالطيبين وحلوين جدا جدا وبيتمنوا لنا كل الخير والدليل علي كده بروتكولات حكماء صهيون, التلمود وباين علي قراته كويس قوي ,,انت لازم تقرأ التلمود شوف كاتبين ايه فيه شوف كاتبين ايه عن الاخوه المسيحين وشوف زرع الكراهيه الهيبه فيه زي كده اما جابوا الاطفال يكتبوا علي الصوارخ اللي تقتل الاطفال والنساء في لبنان وطبيعة اي احتلال في العالم ده اللي انت بتتكلم عنه غير الاحتلال الصهيونيفالفكر الصهيوني باين عليك ماتعرفوش وماتقراش لحد بيشتم فيهم اقرأ كتبهم هم ,,شوف كاتبين في كتابهم السيد المسيح مات ازاي ؟؟ شهقولك حته صغيره م التلمود وهو توراه شفاهيه بمعني مجوعة قواعد ووصايا وشرائع دينه وادبيه وشروح وتفاسير ويوجد اتلمود البابل وواضعه (رب أشي) ويوجد التلمود الاورشليمي(نسبه الي اورشليم) ويتالف الي قسمين (مشناوجمارا) وهاقولك منه حته صغيره جدا مش اوحش حاجه لا عشان تعرف انهم شياطين ..قال التلمود : من العدل ان يقل اليهودي بيه كل كافر ,لانه يسفك دم الكافر يقدم قربانا لله.. وقال الرابي(يهوذكيا) ان هذه الجمله تشمل الوثنين عامة .....وقال الحاخام اليعاذر ان الكفار هم يسوع المسيح ومن اتبعه . ,,,ويفسر(ميمان) كلمة لا تقتل اي ا قتل احدا من بني اسرائيل... وانا مش هاقولك كاتبين اي علي الوثنين والمسيحين ده لهم فصل لوحدهم ومش عايز اقولك عشان ماتتخضش مرهواحده وارجو التوصل بينا ومستني تقلي تب تعرف كاتبينايه ولا لا وانت خليتني كده اكتب بوست عنتعليم اسرائل ,, وفي سؤال ب معلهش هو علم ايه اللي تحت ده

تحياتي

تــحـوتــمـــــس Thutmose said...

ibn nasser

يعني هل انت تقبل واحد يقول رأيه في القرآن زي مانت بتثول رأيك في التوراة و بتقول عنها انها كتاب شيطاني و بيحض على الكراهية و كل ده؟؟
ماهو ممكن اي واحد يقرا القرآن او الانجيل مثلا و يتخيل انهم برضو كذا و كذا و كذا , هيرضيك كده؟؟
ليه صعب اوي نفكر في غيرنا زي مابنفكر في نفسنا

اخي العزيز

انا مليش دعوة التوراة بتقولهم و لا بتعملهم ايه , انا مليش دعوة بدا كلو و انا مش هفسر كتابهم على كيفي و اقول عشان كده يبقو هما شياطين

انا ممكن يكون بيني بينهم بس هوا اتفاقيات و معاهدات و تفاهمات اساسها هو اننا بشر محبين للسلام

بس

محدش شيطان حبيبي محدش صدقني كلنا بشر و لازم ندور على الشيئ المشترك الي بيننا طالما اتكتب علينا نعيش مع بعض او جنب بعض

تحياتي انا ايضا

أمــانــى said...

انا بقى واحدة عنصرية وبجد بأكرهم وكمان الصور مستفزة وبأكرهم بأكرهم وكل اللى يقول عليهم كلام وعايز يطبع معاهم برضو بأكره معاهم
اها مش علشان هما شياطيين لا هما بيقولوا للشياطين قوموا واحنا نقعد مكانكم يعنى هما اكتر من الشياطين ده رايى
وعلى فكرة انا ما كملتش الموضوع لاخره لانى معنديش مرارة وكمان شكلك رغاى وكمان وقتى لا يسمح للرغى الكتير ده
وعلى فكرة لو تحوتمس سمع كلامك ده من غير زعل ولا تطاول منى هيولع فى حضرتك ليه لانهم كانوا عندهم هوية والدليل المعابد وكانوا بيحبوا الارض اكتر من الحياه لازم يكون له هوية ومش معناه انه بياكل كويس وعايش كويس يبقى عايش لا ابدا ماكنش الصهانية جم على فلسطين وعايز وطن وارض وهوية حتى لو على حساب الناس

تــحـوتــمـــــس Thutmose said...

اماني

طيب انتي بتقولي على نفسك انك عنصرية انتي حرة بس اعرفي بأى ان العنصرية جريمة بيعاقب عليها القانون في الدول المتحضرة

لا المصريين مكانوش يقدسو الارض كانو بيقسدو النيل لان النيل هوا الي كان بيحول الطين لخضار و كانو بيقسدو الطيور و الحيوانات الي بتساعد في زرع الارض و الاستفادة منها لكن مكانوش بيقدسو الارض و مفيش اله واحد من اله الفراعنة اسمه اله الارض او اله الطين

و المصريين القدماء مكانوش بيكرهو الاجانب او المختلفين عنهم بدليل ان الاسرة 25الي كونها المك بعنخي كانت من النوبة كوش و مش مصرية و الاسرة ال29 كانت اسرة لوبية من لوبيا الي هيا ليبيا و المصرين استقبلوهم
و العرب لما جوم احتلو مصر من شبه الجزيرة العربيه المصريين استقبلوهم و الاسكندر الاكبر و الفاطميين و غيرهم

متتكلميش بس عن مصر انتي متعرفيش عنها حاجة لانك عربية انا بأى مش عربي انا مصري


و قصدك ايه بالهوية؟؟ هوا الهوية يعني ارض؟؟
لا الهوية مش ارض و الارض ارض في حتة ف الصومال زي النمسا ارض لا تصنع الهوية؟؟
الهوية دي منتج بشري, بيعملوه البشر لما يحسو انهم حققوا انجاز حضاري ما بيعتزو اوي بيه و بيبقى ده هويتهم

زي الهوية المصرية
الي طبعا انتي بتنكريها و شايفا انك صاحبة هوية عربية مثلا

شكرا على التلبيخ

ibn nasser - ابن ناصر said...

كلامك ليس مقنع بالمره اول حاجه انا لم انتقد التوراه انا انتقدت التلمود وهو كتا تعليمي لكل اليهود كالكتب التي يكتبها الشيوخ والقساوسه ,وبعدين قرأن وانجيل ايه اللي انقدو الراجل كتب عندهم فصل بحالوا عن قتلاي واحد غر يهودي اقولك ايه تاني يعني ,,اقولك اهم كاتبين بالحرف أن المسيح مات كالحيوان في زريبه -استغفر الله العظيم- اقولك ان بيقولك لو ست اتوضت ووقععليها نظر كلب او خنزير او برص او كافر تتوضأ تاني !!!! تقتنع ازاي بس
,دي تعاليمهم مش بنتقد كتابهم المقدس لأ تعاليمهم اللي اتربوا عليها
...
ارجو الرد

ibn nasser - ابن ناصر said...

ويا ريت تقرأ التعليقين بدقه لانك يبدوا انك لم تقرأ التعليق الاول بدقه

تــحـوتــمـــــس Thutmose said...

ibn nasser

معلش انا حاولت افهمك على قد ما اقدر
و بقولك انا مليش دعوة بكتبهم مهما كانت
توراة ولا تلمود ولا كتاب تعاليم ولا عفريت ازرق
انا مليش دعوة

انت قريت كتب سيد قطب و ابن تيمية و الاسلاميين الوهابيين؟؟
مش مكتوب عندك ان الشجر هينطق و يقول تعالي يا مسلم اقتل اليهودي
مش مكتوب عندك ان اليهود ابناء قردة و خنازير
و غيرها و غيرها

يعني طب ما اليهود ممكن يقولوا نفس الكلام عن كتب اسلامية

فهمت حضرتك

يا ابن ناصر متكلمنيش من جوا اي دين لا مسلم ولا يهودي انا مليش دعوة بالاديان لان الاديان بتخاطب مصدقينها بس ,,و انا مش مصدق في اليهودية عشان افسرها ولا احاول افهمها و افهم تصرف اليهود على اساسها ,, فالعدل اني ميبقاليش دعوة بيها و محكمش عليهم من جواها,,

انا احكم عليهم من تصرفاتهم و افعالهم مش من كتبهم لان كتبهم مش معمولة عشان يقراها غير اليهودي لان غير اليهودي ممكن يسيئ فهمها زي بالظبط الكتب الاسلامية او المسيحية او الهندوسية

bentfalestine said...

تحتموس
مع اني دخلت مدونتك اول ما شرفتني بالزياره و كل مره اقول بدي اترك رد و انشغل المهم
انا معاك لكل حريته , و انا مع حرية الراي لاخر ذره و مستعده اسمع الصهيوني و البوذي و المسلم و اليهودي و المسيحي و الشيعي و السني و الملحد معنديش مشكله ما دام بيطرح فكره لا بقلل من اهميتها بغض النظر عن موضوعها .

بس!!! اولا ارجو ان تقبل تعليقاتي و انا مستعده للنقاش مش بقوم بفكرك لا بس برد ع افكارك و اعتقد انه من حقي؟؟؟
اول اشي ليسوا بشياطين ؟؟ مش حقولك ملائكه لا ما دام عندي بشر تسقط عنهم الصفتين الشيطنه و الملائكيه فش ملاك بشري و لا شيطان بشري ممكن الاعمال الي تطلق عليها هاي الصفات ..بس خليني احكي اشي هل باعتقادك انن مش شياطين مع تاريخهم الاسود..؟؟بحق شعبي و شعوب العرب كل اعمالهم الوحشيه الا تستحق ان اطلق عليها شيطنه؟؟ مش بقولك احنا ملائكه بس ما هو موقعم من البشريه ؟؟قتلو دمروا اغتصبوا الشجر البحر الهوا عارف مدى الاذى لما بشعر انه بكون ع حاجز تفتيش و بيكون صهيوني واقف جنبي النفس بخنقني ؟

اولا في فرق بين اليهودي و الصهيوني و انت عارف هيك اكيد...الصهيوني انا ضده حتى النخاع و حقدي الازلي عليهم بينما اليهودي الي بيعترف انه اسرائيل كيان غير موجود و ما بيدافعو عنه هدول انا مش ما عندي مشكله معهم بس ما باثرو علي مش اعدائي بالدرجة الاولى انا اعدائي الصهيانية الي بيفرحوا بهزيمتي
انت طرحت موضوع العيش باقليم كاقليه على الاقل , الفلسطينية ليسو اقلية عرقيه حتى ارضى انه يعيشو كما كوبيك و الباسك ؟؟مش حرضى اعيش بقطعه اقليم و انا هاي ارضي ؟؟
اه احنا اصلنا من الفلست و بنكرش هاد تاريخي بس لا يعني اني ارجع ادور عليها عشان اعيش فيها مهي جذوري هناك انا انولدت هون و رح اعيش و اموت هون...انشالله بيرجع اصلي للمتجمد الشمالي ...كل الزعما الصهاينه الحالين و ممكن ترجع لارشيفهم و لا واحد منهم انولد بهالارض ,,ممكن قله بس اغلبهم لاا مش من هالارض و بيحقلش يدافع عنه .. محمود درويش قال لشاعر صهيوني انت بتكتب عن الارض و ممكن انا لا بس مع ذلك انا اقوى قاله كيف حكاله ارتباطي بالارض مش بحاجه لشعر زي ما انت بحاجه للشعر عشان تحاول تثبت نفسك و وجودك ,,, خيي صعب تيجي تحكي لفلسطيني مهما اختلفت درجة فلسطينيته عيش الواقع ..دولة لشعبين تعايش ..مش سهل .. بس بالنسبة لقضية ليش تربينا ع كرههم مع انه جيل سلام مش حرب طب و جيل المولود بعد اوسلو ع شو اربي؟؟ حب الصهاينه ...لليوم و بكره اعترف بكراهيتي لهذا الكيان و الشعب و مش بس كره بل حقد مع اني مش حقوده بس هاد الشعب اه حقوده حتى النخاع و فش واحد يجي يقولي ليش او لا الانسانية لاااا ... هاد الكيان حطم امالي بانه منعني اسافر اكمل تعليمي منعني اني ادخل القدس لاني بشكل خطر..حرمني خطيبي لانه فلسطينية قولنا لا وقفنا و احتجينا خسرت خطيبي ..قتل اخوي سندي بالحياة ..مش بحمل حد جميله هاد واجبي بس بالمقابل لا يحق لاي انسان انه يقولي ليش بتكرهيهم



ههههههه معلش خيي هاد صار بوست مش تعليق عذرا للاطاله و لك الحق بمسحه فلن الومك ..دمت بسلام

تــحـوتــمـــــس Thutmose said...

bentfalestine

امسحه ياسلام امسحه دا كلام

خيتي انا قبل كده قولتلك اني حقيقي عمري ما اقمت حوار اقيم من ده حول هذه القضية

انا لما بقول انهم ليسو شياطين ليس من اعجابي الشديد بيهم بقدر ما هو محاولة ايصال فكرة ممكن تساعد لانشاء السلام بين شعبين

و صدقيني زي ما في اسرائيل في نتنياهو و بن العازر في كمان عمير بيرتس و اولمرت بس الفكرة ان نتيجة لتصرفات العرب العدائية بيضحك العسكريين على الاسرائيليين عشان ينتخبوهم و بيقولولهم احنا عسكرين و نقدر نحميكو من الارهاب الفلسطيني , و العسكريين الاغبياء المتخلفين دول هما سبب المعاناة اليومية للشعب الفلسطيني

و انا هقول ان لو كان العرب اثبتو انهم ينبذو العنف ضد المدنيين و يقبلو وجود اسرائيل مكانش هيعرف العسكريين دول يوصلو للسلطة
بس طبعا دي مجرد فرضية مقدرش اثبتها

الماضي الاسود و الاليم انا عارفه و حافظه و قاسينا هنا في مصر صدقيني , لكنه يظل ماضي انتهى و مات
و انا برضو ممكن اقولك ان على مدى التاريخ مليانة حياة البشر بالنزاعات و الحروب و المجازر و المحارق بس خلاص انتهت و الحياة بتبقالها الكلمة الاولى

و صدقيني فكرة الثأر و الانتقام و الكره و الحقد من اكتر الافكار المدمرة للحياة جوا البنيآدمين و هيا فكرة شيطانية سخيفة
و متهيئلي انها محرمة كمان في كل الاديان

خيتي انتي لو بكرة طردتي اسرائيل من الارض و رميتيهم في البحر
خطيبك مش هيرجع
و مش هيقضي موتة اسعد طبعا
لانه انتهى
بكل الاسف و الحزن و الالم انتهى و مش هيرجع
فازاي عشان خطيبك الي مات تحكمي على اولادك يعيشو حياة تعيسة؟
صدقيني انا حاسس بيكي جدا انتي و كل فلسطيني فقد واحد من اهله
انا بس بحاول اقول ان الكره و الحقد و السخط مش هوا الحل

اختاه انا الاختلاف بيني و بينك في نقطة واحدة بس

مش في ان فلسطين ارضك و وطنك و مكانك انا اكدت على ده اكتر من مرة

اختلافي بس في ان اسرائيل اصبحت تحت اي ظرف كان , اصبحت الان وطن للاسرائلين باي مقياس قانوني او اجتماعي او سياسي

اختلافي معاكي في ان الشعبين اتحكم و اتكتب و انتهى , عليهم انهم يعيشو مع بعض

بغض النظر خيتي عن اي شيئ مهما كان حصل في الماضي
الان سنة الفين و سبعة موجود شعبين تعداد سكان كل منهم يقدر بالملايين
و الشعبين موجودين على نفس الرقعة من الارض ده واقع ,,واقع حقيقي

لايجاد وسيلة تفاهم و تعايش بين الشعبين , الكره و الحقد و الغل و السخط مش الحل و مش الطريقة

سهل
سهل يستمر الوضع الحالي خمسين سنة كمان و ده الي بيحصل
سهل
الكره سهل و الحقد سهل

اختاه هما لما قتلو خطيبك كانو بيكرهوكي
ليه تسمحيلهم يكونو اساتذتك
بدل ما تعليميهم انتي الغفران و التسامح و المحبة

و بعدين حاجة كمان كلمة اقلية في الشرق الاوسط كلمة سمعتها وحشة و بتساوي اضطهاد و تمييز لكن صدقيني مش شرط

و الاقليات الي انا قولتلك عليها برة بتتمتع بكل حقوق مواطنة ولا يمكن ابدا المساس بحقوقهم المدنية و القانونية
و الكل سواء امام القانون و الدستور

مش عيب انك تبقي اقلية, العيب انك تكرهي انسان زيو زيك كل الفرق الي بينكو انك عربية و هو يهودي و اتكتب عليكو تعيشو مع بعض

فكري في البنت الي زيك في اسرائيل الي برضو خطيبها مات في الحرب

فكري فيها و حبيها

حطي ايدك في ايدها بدل ما تكرهو بعض و تنتقمو من بعض , قولو خلاص مش عاوزين حد يموت تاني

كفاية موت و دمار و قتل
ملوش معنى

صدقيني

في حياة البشر كلها اول عن اخر مفيش حاجة اقيم من الحياة نفسها

برضو ده بأى بوست مش تعليق
:)

تحياتي

Utrechty said...

Dear To7otmos,

Very intersting argument indeed!
I do agree with you completely in this issue.
Unfortunately, most readers find it easier to leave someone else to decide for them! Or at least driven by the "Arabic Media" that based on hating the other!

Salaam ya sa7bi,

Utrechty

bentfalestine said...

هههههه سلامات خيي الظاهر رح اترك البلوج عندي و اجي اسكن عندك ..ع كلن الظاهر انه مش رح نتفق فكريا بهالموضوع ممكن بمواضيع تانيه بس نقاشنا بلف لنقطه وحده حلقة شيطان و بلف لنقطة البدايه ..
اه الماضي ماضي بس يمضي التاريخ بما يحمل و يبقى حقدل لها الشعب جديدا الى الابد ضد الاديان مش ضد الاديان مش قضيتي الكراهيه لها الشعب بدمي .. الفرق بيني و بين الصهيونية الي ما بتاثر في لو انتهت هي و كل عيلتها معنديش تعاطف معها لانها ممكن خطيبها او هي قتل ابني و اخوي ..و تعاليم حكومتها نفت اعز الناس عني و عن وطني المهم مش رح اكون استاذتهم بالتسامح لن اعطي جلادي الاحقيه في جلدي ..معلش خيي انسانيتي امام هالشعب تتلاشى

بالتوفيق

mohand said...

السلام عليكم
هههههههههههههههههههههه
وجدت ضالتي
اخيرا لاقيتك كاتب عن اسرائيل
بس غريب جدا الانسان يا اخي
اكيد انت معايا انه غريب
انت من شويه بتتهم الاسلامييين بمحاولة اقامة دوله اسلاميه
انت عارف الحركة الصهيونيه مبنيه علي ايه اساسا
مبنيه علي ارض الميعاد
يعني ارض الله الموعوده
-----------------
بتتهمنا اننا بننشر الحقد والكراهيه
ولما يجي واحد يقولك هما كمان بينشرو تقوله ماليش دعوه بيه
انا ماليش في الاديان
وعلي فكره بما انك مش علي دين يبقي مش من حقكك تنتقد الدين الاسلامي
لانك مش مؤمن بوجود خالق اساسا
يبقي الاول تجادل في وجود خالق
وبعدين تتكلم عن الاديان
--------------
ارجع لموضوعنا
انت بتقول ان دول مش فلسطين لان دوله فلسطين مكنتش موجوده
تخيل بقي
اننا مش مصريين
لان مصر كانت تشمل السودان واجزاء من ليبيا بالاضافه لفلسطين نفسها
واعتقد انك درست دوله اليهود الشماليه ودولة اليهود الجنوبيه والولاء اللي كانو فيه
وانا كنت منتظرك تقولي انو حقهم علي فكره
كنت هرد عليك رد زي العسل
بس انت طلعت جدع ومذكرتش موضوع الدول اليهوديه القديمه
اللي اعتقد انك درستها في ماده تاريخ الشرق الادني
-------------
تصدق انا حاسس انك مش دارس علم اثار
انت ممكن تكون سياحه وفنادق
او السن
لان في معلومات جامده قوي مختلطه عليك
مش عارف درستها فين ولا دكتور مين قالهالك
علي فكره انا من دفعه قبلك لان اتضحلي انك اصغر مني


عموما انا بس حبيت اقول يعني في الاخر
يا ريت نبقي نجيب ادله علي اقولنا وبلاش تضارب اراء

تــحـوتــمـــــس Thutmose said...

مهند

انت قريت البلوج كله على انه مقال واحد و ده غلط انا كل بوست ببعته ليا فيه طريقة خطاب معينة

ايوة انا مبحبش ادخل الدين وزي ما بنتقد الاسلام السياسي بنتقد اليهودية السياسية و انا ذكرت الكراهية في المقال ده كسلوك انساني بيعملوه العرب و مجبتش سيرة الدين الاسلامي لكن انت بذكائك رحت جبت سيرة الدين من بوست تاني و جيت ترد هنا


و هو لما اقول اني مش موافق على دولة اسلامية يبقى انا بتكلم عن الدين الاسلامي انا يا اخ مليش دعوة بالدين الاسلامي انا بتكلم عن مصر مش عاوز بلدي تتحكم بدين ايا كان

و ليه مليش حق انتقد الاسلام ايه الحجر السخيف بتاعك ده انا من حقي و من حق اي شخص انه ينتقد اي فكر مهما كان
ولا انت خايف انه لما يتنقد يطلع فه مليون كارثة

انا بقول مكانتش فيه دولة فلسطينية مكانش فيه حكومة فلسطينية ولا جيش او شرطة او قضاء او مؤسسات فلسطينية لما قامت اسرائيل و ده كلام سهل اوي التأكد منه
و سياقك لمثال مصر هو في منتهى الخرف و بتقول على نفسك دارس مصريات طب متعرفش ان مصر بحدودها الطبيعية الي هيا الصحرائين و البحرين و النيل تعتبر اقدم دولة في التاريخ و اقدم حكومة مركزية و اقدم حدود ثابتة

يعني لو كنت قولت امريكا كان يبقى عندك بعض من المنطق و هقولك مكانش فيه امريكا لما بدأت الخليقة لكن دلوقتي في اكبر دولة في العالم و ده طبيعي مكانش في اسرائيل زمان لكن دلوقتي اسرائيل وطن لملايين البشر و ذات حدود و سيادة

و وحياتك سيبك مني و منك ومين اكبر و مين اصغر و مين كافر و مين مسلم و شهادتي و شهادتك بلاش و النبي الاسلوب الاسلامي الجميل ده لحسن بيستفزني

يا ساتر

mohand said...
This comment has been removed by the author.
mohand said...

السلام عليكم
أولا طبعا أنت بتبعد عن الحقائق كتير قوي
وأنا ذكرت انك دارس اثار وانا دارس علي اعتبار إننا نتكلم بالعلم
لكن الظاهر اننا بنتكلم بالصوت بس
وتتهمني اني بحجر علي الآراء في الأخر
--------------
مصر مش اقدم دوله ذات حكومه مركزيه
ولك ان تتاكد يا اخي
انا مش جايب الكلام ده من عند عم عبده البقال
---------------
حدود مصر مش زي ما حضرتك ذكرت
بدليل وجود بقايا معابد ذات تراث مصري في فلسطين وسوريا وسيناء والصحراء الغربية اللي متداخلة جوه ليبيا وطبعا السودان كانت ضمن حدود مصر مش كلها طبعا بس جزء كبير منها
---------------------------
موضوع أنى جبت من بوست تاني
حضرتك معقول تقنعني أن أفكارك مش متسلسلة وواحدة واللي تقوله دوقتي مش يؤخذ عليك بعد يومين يعني هجيب مثال هتقول عليه بعيد عن الموضوع بس أنا شايف انه قريب
مش معقول تقولي النهارده انك بتنبذ العنف والإرهاب ضد أمريكا مثلا
وتيجي تاني يوم تقولي انا مع عنف إسرائيل ضد فلسطين
دا اسمه الكيل بمكيالين
او التخبط الفكري بقي
---------------------
موضوع اكبر واصغر من مش ذكرته علشان أقولك أن دماغي احسن من دماغك ولا كلام عبيط من ده
انا بقول ممكن نكون نعرف بعض علي اساس اني الدفعه السابقه لك
ولو قريت كلامي كويس هتفهم كده
وهديت شويه علشان الاستفزاز اللي انت فيه بس
-------------------
أنا سعيد أنى قدرت استفز شخصيه زي حضرتك مستفزة بطبعها
يعني لما اجي أنا العبد الفقير الغلبان استفز ملك الاستفزاز
ابقي خدت شهادة اعتز بيها
-----------------
حاجه كمان هقولهالك
قول الحق بيطلع علي اللسان غصب عنك
انت قولت والنبي
إذا كنت مش مؤمن بوجد خالق هتكون مؤمن بوجود نبي
ومتقوليش حضرتك أن ديه بعض ألفاظ الجهل واخدها معاك من بيتكم وجيت بيها هنا غصب عنك
---------------------
عايز اقول حاجه صوغننه هنا
أنت بتنتقد الدين الإسلامي بس ؟
ولا تخصص ولا ايه
اصل كل الملحدين عند الإسلام ويغلطوا
ولا أنت مؤمن أن باقي الأديان صح والإسلام هوه اللي غلط
ومعلومة ليك صحيح مش هتقدر تطلع في الإسلام بلاوي زي ما بتقول المشكلة أنكم مش بتواجهوا انتوا بتقولوا ولما يجلكم متخصص تتهربوا
--------------------
علي فكره
لو عايز تجادل في الإسلام في ناس متخصصين
أنا مش هجادلك
لان معنديش العلم
زي ما حضرتك مش عندك علم أساسا
بدليل انك ذكرت التقيه وأنت بتنتقد السلفيين أهل السنه والجماعة
والتقيه دي يا أستاذ في المذهب الشيعي بس
مفيش في السنه والجماعة حاجه اسمها تقية
علي فكره دي جايبها من موضوع تاني
دمتم علي خير
أن شاء الله
مع تمنياتي بالتوفيق
مهند المصري
الباحث عن الحقيقة

تــحـوتــمـــــس Thutmose said...

مهند

انااسف و غلطان اني رديت عليك

مبروك